【駕駛心得】跟車太貼，車頭生痲疹

最近拎咗架車返廠換 cam 帶之餘，亦洗多咗錢去翻噴車頭泵把。
也許沒有人會將架車在沒有揩花撞崩的情況下， 走去把泵把翻噴油，因為一旦翻噴過，下手買家就會以為我撞過車，咁印象分和賣價就大打折扣。

跟車太貼，車頭生痲疹

架車行走多年，個泵把，頭唇和車頭蓋都巳經好似生麻疹咁，花得好犀利。

實在花到頂佢唔順，去酒店俾人代客泊車，都怕失禮個職員。

(圖片攝自停車場裡的舊車)

以前初學車時，揸得慢咪無事囉，後來揸熟咗， 就吓吓追住人哋個屁股行。

 50公里又咁哄住人哋屁股，100公里又哄住人哋屁股，哄得兩哄，就俾前車捲起的沙泥碎石，好似噴沙咁射向車頭。

就咁個車頭就好似生麻疹咁，越來越多花痕。

嗰 d 花痕係由細小沙粒或石仔高速撞擊漆面造成

漆面被沙粒、石仔、螺絲等硬物撞上，會崩裂整塊脫掉， 露出底層黑色或灰色的底油，非常肉酸。打蠟都遮唔到，仲鞋拾拾咁。

越係近住地面的部份，花得越密越嚴重，打臘都整唔走。

車頭冚比較高、角度比較斜，還好無咁花，因為車頭冚是鋼造夠堅硬，花得無咁勁， 但泵把頭唇是用塑膠製造，質地比較柔軟，俾石仔一打就花，無咁襟撞。

泵把連頭唇共兩件野，噴油費計兩件，洗費都幾甘。

---Advertisement

---

新噴好個泵把頭唇，好似新車咁靚仔，緊係唔想咁快又再整花。所以我唔再哄住人哋個屁股行，彈開好遠黎行，速度越快彈開就越遠。

但係彈開好遠黎行，就有好多人見我前面有大段空位，就會從後加速上來爬頭，再攝到我前面個空位，都好麻煩。

有 d 衰人仲鬼咁近咁樣 cut 入黎我前面， 咁佢車呔捲起的沙塵會打花我個靚泵把，搞到我時常要勁剎車去避開呢 d 人喎， 幾衰呀。

所以政府話保持兩秒安全距離喎，係咁令其他人在後面爬頭上來，再被打尖在前面插入黎，都唔安全得晒架。

有時見到後面條茂臣想插我頭，局住都要封住佢個位， 咪等佢又玩近距離 cut 線，幫我打花個泵把。

因為路中心，即係白線個位最多沙石積住係度，俾人係前面 cut 入黎，佢個車轆就要踩上白線，咁佢車轆就會捲起沙石再打落我個泵把度，咁仲衰過我哄住前面架車...

結果試驗幾個月咁樣揸車法，發現泵把頭唇仍保持原好無花，真係幾好。
不過用手摸吓，已經無咗新噴嗰種滑溜，輕微鞋咗少少。

所以唔想個車頭蓋泵把花得咁快，記住盡量唔好跟車太貼喇。


作者: holidaydriver
發佈日期: 2011/08/07

更新日期：2022-02-19