泊 L 位心得

邊種位大家應為難泊的呢??

當然 S 位 最難泊 ， S 位仲最易撞添，有人泊 S 位 真係聽聲停(撞到先停)，親眼見過先知原來有人咁變態。

作者: holidaydriver | 發佈日期: 2010-07-24 | 更新日期: 2026-02-21

人 肉後波雷達  ( 圖片來源: 大眾汽車)

我又見過有人給前後車夾實出唔到 S位，被迫將前面架車撞開才能駛走...
唉，如果無乜必要，真係少 泊 S 位為妙。

給前後車夾實出唔到 S位

學車果陣泊 S 位 ，架車同地下有晒標記，所以 S 位 好似好易泊，但實際街上唔會安裝呢種標記，商場內又以 L位 居多，所以有些新牌就唔識泊車。

商場內又以 L位 居多

L 位其實最容易泊，其實有 marking 可遁，點都好過泊 S 位。S 位我唔知有無 marking，只可睇住地下和前後兩車扭來扭去。

---Ads

---

泊 L 位心得

去到 L 位，先留意以下事項：

① 車位闊度

車位闊度是否足夠容納自己車身，旁邊的 車有沒有泊到過界「咩」埋一邊 (如下圖的黑色車)，是否有足夠空間開門落車。

私家車越界停泊，令左邊的車位變得狹窄（ 圖片來源 hk01.com  , fb「馬路的事討論區」）

② 車位週圍的雜物

留意L 位後方及兩旁有無凸出的雜物，例如：
咪錶、鐵柱、鐵架、鐵絲網、欄杆樹木、樓梯、石級、階磚、牆角、石頭、坑渠、水管、消防喉、大門出入口、手推車、行人 之類會頂車尾，車肚和車門的危害物。

③ 旁邊有甚麼車

旁邊是否有重型車、貨 van、貨車、小巴、的士、殘舊爛車、飛仔車、單門跑車之類，這些車容易導致撞門 或 刮花車身，若有就最好避之則吉 。

這類車的 車 門比較高大和笨重，車門要開得大大乘客才能上落，這樣容易有衝撞你的車身的風險。

泊在兩旁大車中間，車位狹窄，出入困難

貨 van、貨車經常 會用手推車上落貨，而且貨車多數屬於公司財產，司機通常無咁錫車，日日粗洗粗用，揩揩碰碰對他們來講只是家常便飯。

但你的車屬於你自己財物，車身俾人撞凹咗不好看，多數要花錢去整，不同於貨車，等如瓷器砍缸瓦。

貨van司機做開門L，撞完一下又一下 (圖片來源 車cam - 香港制造)

④ 上方的凸出物或懸吊物

如要停泊比較高身的七人車，要睇清楚天花有無石屎的凸出物，例如橫樑、向下斜的樓梯底、 牆後凸出的騎樓、 藏消防喉的入牆結構等。

還有 睇清楚天花有無吊下來的高度限制牌、圍欄、 光管、水渠之類的物體，因為車尾雷達無法掃到高處位置的障礙物 。

⑤ 天花板是否穩固

睇清楚天花板有無殘舊可能掉下來的光管、石屎 裂縫、批盪鬆脫、屎渠滴水 或 喉管上邊有雀仔或放了雜物，都可免則免 。

天花冧石屎撞花車身 (圖片來源: 東方日報)

⑥ 泊車的地方是否斜坡

泊車的地方若是斜坡的話，泊車時要留意不要泊得太接近其他車。因為路面傾斜向下一方的那邊車門，一旦打開時，車門會受地心吸力影响而自動張開到盡，通常乘客落車或上車時，沒有這種 斜坡上落車經驗，沒有用手捉緊車門，很易一開車門就甩手，整個車門自動向斜坡下面掉下去，車門就狠狠敲到旁邊車輛的車身，無辜做了開門L。

斜坡泊車時，要留意不要泊得太接近其他車

選擇安全的L位泊車心得

如果停車場內有很多 L 位，該如何選擇風險最低的車位去泊，才可減低被其他車無辜擦撞的機會，尤其是打算會長期停泊，或短暫停泊，但停車場有很大的流量。

在停車場內，許多人泊車揀位都是貪方便就手，見有位就泊，沒有太多考究，但咁樣有機會遇到被人 Hit and run 的情況。我試過車頭泵把被人磨走了一忽，尾泵把被人撞到縮咗入去又找不到兇手，無仇報。所以我就研究出一套揀泊車位的藝術，我認為泊車位不是全部都一樣，絕對可以催吉避兇。用咗這方法之後，我就減少了被人撞頭撞尾 Hit and Run 的情況。

L 位的首選 - 獨立自閉位

L位的首選是獨立的自閉車位，即車位週圍沒有相鄰車位。

這種車位由於週遭沒有其他車會駛近或停泊的，所以車身得到極強保障，是最安全的首選車位。這種位除了讓乘客容易上落之外，更可避免隔離有失暈魚大力開門，造成衝撞或拍打到車身，亦減低有貨車在旁邊上落貨，造成揩花撞崩的機會。

由於車位某程度被柱或牆包圍，較少閒雜人等或手推車送貨佬走近，能大大減低車輛受損風險。

我覺得這種車位保值機會最高，在打風落雨時所受到的災害或影響相對地少。

兩邊有柱的獨立自閉位風險最低， 旁邊沒有開門L 衝撞車身或貨車上落貨

靠牆又掘頭的獨立車位風險也最低，週圍沒有車輛或閒人活動

L 位的次選 - 單邊位

次選就是單邊泊位，這種位只有其中一邊有其他車停泊，人為損傷的風險是有，但比一般車位為低。由於其中一邊是牆或行車道，沒有其他車會泊進來，所以車可以稍為泊得開一點，一來可讓車輛乘客可有多一些空間上落，另外能減低鄰車的開門 L 衝撞或拍打車身的風險。

單邊位面對旁邊車輛駛出駛入的次數較少，因為只有其中一邊有其他車駛出駛入，實際會遇到多少車視乎停泊多久及車流。例如醫院的停車場收費貴，車位又少，人們泊一陣就走，同一車位會不停流轉，這樣遇到開門L的機會也會提高。

單邊位的另一邊因為無位可泊，相對安靜，被 Hit and Run 的機會就幾近沒有。所以我泊車通常會先揀單邊位泊，一來落車時旁邊無車阻住，車門可開到大大，二來有時在超市掃完貨，拎住幾袋放上後座也方便，不用下下就住隻車門擘唔開，要放到車尾箱。

單邊泊位， 其中一邊沒車會泊進來，風險較低

像下圖的停車場，有兩個可停泊的L車位，包括1號位和 4號位，你認為泊那一個位比較安全?

1號車位比4號車位有更低的風險

開估 ➡ 1號車位屬於單邊位，是今次的首選車位，其次是4號位。

1號車位的其中一邊是草地，只有另一邊的2號位會有車出入，會遇到開門L的機會只得一半。而且在2號位右邊車門上落車的人通常是對方的司機，較少機會是乘客。因此泊在1號位會遇到開門L的機會是相對低一些。

相反，4號位兩邊都有車出入，包括3號及5號位都可以泊車，這樣4號位左右兩邊都有機會遇到開門L，所以把車泊在4號位的風險，比1號位大得多。

除此之外，這個停車場的5個車位尾部都靠牆，沒有車可以在車尾停泊或駛過，對車尾的安全保障極佳。但有些停車場的牆身會有機房或儲物室，就可能有保安或工程人員搬運雜物進出，若泊在這種有門的牆時，就要小心車尾會有被人撞花的風險。

L 位的退而求其次選擇 - 四面通風位

排第三位的L車位，就是下圖近中間行的車位。這一行車位面對上述4號車位的潛在風險，而且它頭尾兩邊都有車可以駛過，令車頭和車尾都有機會遇到路人或手推車，甚至被其他車不慎 Hit and Run。所以這款車位的風險相比上面任何一款都要高，如非必要，盡可能不要泊這種位。

泊位四面都有車流動，Hit and Run 風險大

L 位的最差選擇 - 背對背位

風險含量極高的車位，本人極不推薦去泊這款車位，就是下圖那些「背對對」的車位。

這種背對對的車位由於後方沒有絕對可控的邊界，也不易看清楚，許多司機在倒後時都會碌過界而不自知，像下面兩張圖的情況。

「背對對」的車位容易有碌過界發生碰撞的風險

支持我有這個不推薦「背對對」的原因，是我在西九龍中心停車場遇到了一次碰撞事故。

話說我當日在西九龍中心停車場泊在一個背對背車位，那時我背後的位並未有其他車停泊。不久，我目睹另一架車身頗長的旱見豪款車駛到我車後面，那個司機打算把車泊在我架車的後面。我見他大腳油急速倒後，然後大腳急速剎停，動作之快令我覺得他是代客泊車的車手。

但他判斷錯誤，他的車尾竟碰到我架車的尾巴，令我架車向前彈了一下，幸好撞擊力度不算很猛，我車尾泵把並無凹陷。我認為他在車上該能感覺到車子碰到東西，但他下車後沒有回頭，連自己的車也沒看一眼就走了，像沒有事發生一樣。

「背對對」的車位容易有碌過界發生

L 位的高風險選擇 - 背對門位

最後輪到風險大，損失高的L 泊位，就是下圖的呈T字形的L泊位，這款泊位在很多大商場都有。這款車身朝向另一部車的車尾泊位佈局，容易發生在紅色車倒後時不慎倒過了頭，撞到白色車的車門上，造成車身更大面積的損壞。要修理這種損傷就不是單純修一個凹痕咁簡單，因為可能涉及兩隻車門和B柱，費用相對較高。

呈T字形的L泊位有車身被碰傷的風險

L 位的打風落雨選擇 - 不泊露天位

我在科學園返工的日子，常泊在一期的多層停車場。那個停車場其中一邊是大廈外牆，算是露天的開揚位，有太陽可以晒進來，很多人喜歡泊在那一行近露天的車位。由於我上班遲，那些位我很少泊得到，所以我多數泊在靠牆那一邊。

有一天我竟然泊到那個露天位，感到很開心，不料放工時狂風暴雨來襲，我到達車位時，半邊車都在水中，風雨直沖入來，冒雨上車份外困難，這是我意料不及。自此之後，我覺得還是泊近內牆比較好，這才是泊室內的好處。

左邊車位露天，遇著打風落雨，上車時會一身濕

泊 L位 步驟 ：

假設現在要泊進左邊的 L位，而 L位 兩旁都有車。

L 位 的 Marking ，是利用左邊人地個車頭泵把嘅右上角做指標，你用左邊鏡睇住人哋個車頭，挨住佢咁後彎入去。
同時留意自己車頭右邊，小心向右掃到其他車呀、柱呀、人呀之類。

彎到咁上吓睇返右邊鏡，夠位就直後，唔夠位最好唔好搏，先停下。
建議裝個 後波雷達 ，它應付這情況十分有效，有咗佢一定唔會撞到右後方車頭左角都唔知。

厘個右後方車頭左角既距離係好難用眼判斷，尤其當環境陰暗時。不用落車睇位，總之一句唔好貪快搏佢唔撞，就唔會有事。

除了使用後波雷達，你還可以留意 車尾燈影的變化 來評估跟後面硬物的距離。

汽車工程師設計的車尾燈除了用作指示和照明外，它射出的燈影闊度，在黑暗時可以用來測距，方便泊車。

---Advertisement

---

當你車尾移近硬物時，投射於後方硬物或牆壁上的燈影便會不斷收細，當收細到某個範圍，便會跟硬物非常接近，當燈影細到不見了，代表硬物跟你的車尾幾乎碰在一起，這時尾燈的強光剛好透不到地面或四週。

所以倒後時，留意後方及地面的燈影變化，可以防止碰撞。

將車向右扭再駛前，直至右邊鏡見到右後方車頭左角少許，睇返左邊鏡車尾要與左邊車保持一致距離，留意唔好撞到對方倒後鏡，然後慢慢直後。

如對車尾環境不肯定，例如泊爛地場，最好先落車行去車尾望清楚，不要貪快一野隊埋去，咁好易撞石、撞鐵柱、甚至跌落斜波、坑渠。

泊 L位 有樣嘢新牌要警覺：

① 切勿泊到 「咩」 埋一邊，貼近別人的車輛，若然因此導致旁邊車的司機無法開門上車的話，閣下的座駕有很大機會被人用硬物刮花車身，作為忿怒的回敬。

② 切勿懶醒咁，將車尾泊到貼牆，一隻手指位都無，唔俾人行過，諗住技驚四座。
咁樣視乎情況，例如當有其他車泊到你車身旁邊，但咁啱車位是單邊位兼有條柱阻住，車上司機落車後發現右邊有柱行唔出，左邊又挨貼牆出唔到，諗住經你車尾行出來點知又一條罅都無又出唔到，他可能因為感到難堪，就會用硬物遷怒於你貼牆的車尾，留下抗議長痕。
我以前都好鍾意學人泊貼牆，但見過有人架車慘遭毒手，已經無再咁做，車尾留一條生路畀人行過，比較好。

車尾泊貼牆，易被路過的人刮花車尾

究竟扭出架車成45度方法咁入，係有乜竅門呢？

師傅教泊 L位 的方法係，將車駛前目標 L 位約個半車位後，扭盡左軚 L字入。
但如果泊到埋去，才見架車前得滯 或 後得滯，會撞到左右兩邊車時，就只能將架車重新駛出再試過，咁樣泊法係會阻住人，自己壓力又大。

其實最強嘅師傅教落，唔好成日諗住 formula (公式)，次次泊車環境位置都唔同，要學吓憑眼晴去觀察及感覺 後轆在地面走的軌跡。
其他人見個位唔夠，會扭出架車然後成45度入，扭出45度角嘅目的，是為了令側鏡看清楚泊位，瞄準倒後更快捷，十拿九穩入到位。

而完全 L 的泊法，側鏡是看不清楚泊位，要後彎到咁上下先見到條尾入唔入到，入唔到的話，好多時要成架車出返嚟，再嚟過。

---Ads

---

45 度泊法實質唔一定 45 度，你渣架車埋去 L 位時，要開始評估尾轆在後面的位置及方向，當差不多抵達 L 位的邊沿時要減慢，並估計你扭 45 度角多少才能令尾轆的方向對準 L 位。

換句話說，只要你能預估到尾轆位置及指向，你便能把車輛的尾巴 扭動若干角度之後停下，你的車尾已差不多瞄準那 L 位，只是直後加少許彎便順利入位了。

你能扭多少角度視乎 L 位對面的車有多近，若很近的話便扭不了多少角度，情況便跟完全 L 泊法一樣。

泊 L 位不用成個頭擰去後面，睇鏡就得。若果唔留意車頭， 好易 車頭掃到野 都唔知。

“
倒車果陣，記住千祈唔好死望住後面，要不斷掃視車的四角，避免撞到野都唔知。

holidaydriver 最愛泊單邊的 L位，被撞風險最低