邊種位大家應為難泊的呢??

當然 S 位 最難泊，S 位仲最易撞添，有人泊 S 位 真係聽聲停(撞到先停)，親眼見過先知原來有人咁變態。

人肉後波雷達 (圖片來源: 大眾汽車)

我又見過有人給前後車夾實出唔到 S位，被迫將前面架車撞開才能駛走...
唉，如果無乜必要，真係少 泊 S 位為妙。

學車果陣泊 S 位 ，架車同地下有晒標記，所以 S 位 好似好易泊，但實際街上唔會安裝呢種標記，商場內又以 L位 居多，所以有些新牌就唔識泊車。

L 位其實最容易泊，其實有 marking 可遁，點都好過泊 S 位。S 位我唔知有無 marking，只可睇住地下和前後兩車扭來扭去。

---Ads

---

泊 L 位心得

去到 L 位，先留意以下事項：

① 車位闊度是否足夠容納自己車身，旁邊的 車有沒有泊到過界「咩」埋一邊 (如下圖的黑色車)，是否有足夠空間開門落車。

私家車越界停泊，令左邊的車位變得狹窄（圖片來源 hk01.com , fb「馬路的事討論區」）

② L 位後方及兩旁有無凸出的雜物，例如 咪錶、鐵柱、鐵架、鐵絲網、欄杆樹木、樓梯、石級、階磚、牆角、石頭、坑渠、水管、消防喉、大門出入口、手推車、行人 之類會頂車尾，車肚和車門的危害物。

③旁邊車是否重型車、貨 van、貨車、小巴、的士、殘舊爛車、飛仔車、單門跑車 之類易導致撞門 或 刮花車身，最好避之則吉。這類車的車門比較高大和重，門要開得大大才能上落，容易衝撞你的車身。

貨 van、貨車又會用手推車上落貨，而且司機通常無咁錫車，揩揩碰碰對他們來講好少事。

貨van司機做開門L，撞完一下又一下 (圖片來源 車cam - 香港制造)

④ 如泊高身七人車，睇清楚天花有無石屎凸出物、光管、水渠、騎樓之類的牆後凸出物，因為雷達掃唔到高處位置。

⑤天花有無殘舊可能墮下之光管、石屎 裂縫、批盪、屎渠滴水 或 喉管上邊有雀仔，都可免則免。

天花冧石屎撞花車身 (圖片來源: 東方日報)

⑥ 泊車的地方若是斜坡的話，泊車時要留意不要泊得太接近其他車。因為路面傾斜向下一方的那邊車門，一旦打開時，車門會受地心吸力影响而自動張開到盡，通常乘客落車或上車時，沒有這種斜坡上落車經驗，沒有用力捉緊車門，很易一開車門就甩手，整個車門自動向斜坡下面掉下去，車門就狠狠敲到旁邊車輛的車身，無辜做了開門L。

泊 L位 步驟 ：

假設現在要泊進左邊的 L位，而 L位 兩旁都有車。

L 位 的 Marking ，是利用左邊人地個車頭泵把嘅右上角做指標，你用左邊鏡睇住人哋個車頭，挨住佢咁後彎入去。
同時留意自己車頭右邊，小心向右掃到其他車呀、柱呀、人呀之類。

彎到咁上吓睇返右邊鏡，夠位就直後，唔夠位最好唔好搏，先停下。
建議裝個後波雷達，它應付這情況十分有效，有咗佢一定唔會撞到右後方車頭左角都唔知。

厘個右後方車頭左角既距離係好難用眼判斷，尤其當環境陰暗時。不用落車睇位，總之一句唔好貪快搏佢唔撞，就唔會有事。

除了使用後波雷達，你還可以留意車尾燈影的變化來評估跟後面硬物的距離。

汽車工程師設計的車尾燈除了用作指示和照明外，它射出的燈影闊度，在黑暗時可以用來測距，方便泊車。

---Advertisement

---

當你車尾移近硬物時，投射於後方硬物或牆壁上的燈影便會不斷收細，當收細到某個範圍，便會跟硬物非常接近，當燈影細到不見了，代表硬物跟你的車尾幾乎碰在一起，這時尾燈的強光剛好透不到地面或四週。

所以倒後時，留意後方及地面的燈影變化，可以防止碰撞。

將車向右扭再駛前，直至右邊鏡見到右後方車頭左角少許，睇返左邊鏡車尾要與左邊車保持一致距離，留意唔好撞到對方倒後鏡，然後慢慢直後。

如對車尾環境不肯定，例如泊爛地場，最好先落車行去車尾望清楚，不要貪快一野隊埋去，咁好易撞石、撞鐵柱、甚至跌落斜波、坑渠。

泊 L位 有樣嘢新牌要警覺：

①切勿泊到 「咩」 埋一邊，貼近別人的車輛，若然因此導致旁邊車的司機無法開門上車的話，閣下的座駕有很大機會被人用硬物刮花車身，作為忿怒的回敬。

②切勿懶醒咁，將車尾泊到貼牆，一隻手指位都無，唔俾人行過，諗住技驚四座，威震全場。
咁樣視乎情況，例如當有其他車泊到你車身旁邊，但咁啱車位是單邊位兼有條柱阻住，車上司機落車後發現右邊有柱行唔出，左邊又挨貼牆出唔到，諗住經你車尾行出來點知又一條罅都無又出唔到，他可能因為感到難堪，就會用硬物遷怒於你貼牆的車尾，留下抗議長痕。
我以前都好鍾意學人泊貼牆，但見過有人架車慘遭毒手，已經無再咁做，留人一條生路比較好。

究竟扭出架車成45度方法咁入，係有乜竅門呢？

師傅教泊 L位 的方法係，將車駛前目標 L 位約個半車位後，扭盡左軚 L字入。
但如果泊到埋去，才見架車前得滯 或 後得滯，會撞到左右兩邊車時，就只能將架車重新駛出再試過，咁樣泊法係會阻住人，自己壓力又大。

其實最強嘅師傅教落，唔好成日諗住 formula (公式)，次次泊車環境位置都唔同，要學吓憑眼晴去觀察及感覺 後轆在地面走的軌跡。
其他人見個位唔夠，會扭出架車然後成45度入，扭出45度角嘅目的，是為了令側鏡看清楚泊位，瞄準倒後更快捷，十拿九穩入到位。

而完全 L 的泊法，側鏡是看不清楚泊位，要後彎到咁上下先見到條尾入唔入到，入唔到的話，好多時要成架車出返嚟，再嚟過。

---Ads

---

45 度泊法實質唔一定 45 度，你渣架車埋去 L 位時，要開始評估尾轆在後面的位置及方向，當差不多抵達 L 位的邊沿時要減慢，並估計你扭 45 度角多少才能令尾轆的方向對準 L 位。

換句話說，只要你能預估到尾轆位置及指向，你便能把車輛的尾巴 扭動若干角度之後停下，你的車尾已差不多瞄準那 L 位，只是直後加少許彎便順利入位了。

你能扭多少角度視乎 L 位對面的車有多近，若很近的話便扭不了多少角度，情況便跟完全 L 泊法一樣。

泊 L 位不用成個頭擰去後面，睇鏡就得。若果唔留意車頭，好易車頭掃到野都唔知。

倒車果陣，記住千祈唔好死望住後面，要不斷掃視車的四角，避免撞到野都唔知。

作者: holidaydriver
發佈日期: 2010-07-24
更新日期: 2022-05-23