2012年度驗車，無電撻車，換車牌，換 「Yokohama Earth-1 EP400 」車呔

前年呢個時候，我係沙田馬騮山度，同架車和一群馬騮仔係度晒太陽，因為擋風玻璃裂咗驗車肥咗，落旺角買咗一套玻璃修補膠水，整好晒之後拎去晒太陽紫外光固化，效果 OK 驗車又過到骨。

2012年度驗車

前年第一次膽粗粗自己拎架車去驗，好多野都唔識無自己check清楚架車就走去驗，結果衰咗DVD機唔合法，唔得要拆走，俾咗100元音响舖去拆，塊擋風玻璃有粒星星裂痕又唔得要整，車尾車牌孔位裂咗少少又話唔得，要成塊換，車尾車牌燈有一粒燒咗又唔得，咁就要翻驗。

---Advertisement

---

其實打算第一次自己揸去驗車，應該自行做少少功課，就唔難一次pass。除非有 機件損壞、或車上有非法改裝，要返車房先搞到嘅就話無法子要俾人做。

最基本可以自己先檢查以下部份:

(1) 車牌有無裂痕

尤其位於螺絲孔。部份車牌用膠貼，用手拉吓有無黐唔實。 (其實靠黐應該唔多得，始終有機會甩出黎)

(2) 擋風玻璃有無裂痕

小星星有時得，有時星星太大，裂痕太長太礙眼，師傅擔心佢會越裂越大又唔得，要拎去玻璃舖打膠水。

(3) 車內外燈膽是否正常

所有大燈、小燈、指揮燈、車牌燈有無燒咗唔著，測試指揮燈左右運作是否正常。

(4) 車呔紋深度夠唔夠1mm

呔紋唔夠深，落雨行車或踩水有跣呔危險。

(5) 車上液體是否充足

水撥水，電池水，偈油、波箱油、軚油、迫力油水平是否充足，唔夠要入返滿。

(6) 留意停車位地上濕潤痕跡

留意停車位地上有無漏油、漏水漬象，如果車底有滲漏，一定要先拎去維修，否則一定不合格。

(7) 留意車燈光度，燈影高度

判斷電池有無充足電力，有無過期。 若曾經更換車頭燈膽，需檢查車頭燈燈影高度有無超過法定高度。

(8) 檢查有無安裝不合法例的設備

例如DVD 機頭，反光紙，茶紙，碳纖貼紙等物品。

(9) 留意死氣喉排出的廢氣顏色

留意廢氣味有無異常，如有藍煙、白煙、黑煙，很大汽油味，一定要拎去維修。

(10) 檢查車上有無非法改裝

如果是買返黎的二手車，要了解及檢查車上有無任何非法改裝，包括進氣、排氣、剎車鉗、避震、尾翼、頭尾冚、引擎編號、車頭 HID 燈或非原廠燈組的改裝等。

(11) 檢查所有車門、車窗、頭尾冚是否正常操作

車門車窗有無開不到、鎖不緊的情況。

(12) 檢查安全帶及安全帶釦功能

檢查車內所有安全帶及安全帶釦是否正常運作， 有無開不到、鎖不緊的情況。

舊年車仔無乜麻煩，因為架車俾咗豐田做「政府驗車前免費預檢」服務，貪佢有額外維修零件及人工半價優惠，揾佢地幫手換埋 CAM 帶和驗埋車，一次過搞掂。

今年又到自己拎架車去驗，不過今年就遇到一些麻煩。

第一次用網上續領十年期駕駛執照，用繳費聆即時付款洗咗900元。

晨早八點幾起身打算去驗車，想打電話去豐田驗車中心預約，點知無人聽。

找回那份牌薄正本，落街花11元買咗一支AA膠諗住黐返前面車牌戈成寸長裂痕，點知唔得，結果要用60元去呔舖整過一塊新車牌。

---Advertisement

---

當用電筒檢查水箱存量時，見車廂燈隨指揮燈閃動，unlock 防盜喇叭都唔多想叫，覺得架車可能無電，於是試吓撻匙，摩打真係粒聲唔出一片死寂。

於是先替水壼注返滿水，返家檢查紀錄，發現電池是2010年3月買的，用咗剛好兩年，雖然環保電池裡面有綠色顯示，但電池外殼有些微拱起，車只係無用17天就無晒電，感覺十分不妥。

走去屋企附近相熟呔舖借咗一件電池同埋好巨型的過江龍，諗住捧返屋企撻車，但電池好鬼重，加埋好重既過江龍，拎到我斷晒氣，大凍天時行一個街口，已經全身標晒汗。

等我仲係網上面叫 d 人去呔舖借電池，若要抬電池又無手拉車，行太遠真係未必得囉，實在太重了。(我量過一粒汽車電池重量，大約16公斤，約兩包米的重量)

電池，過江龍

接駁過江龍步驟

電池拎到返去，依照網上教人的方法次序接駁過江龍，原來將過江龍直駁電池正極真係會有好大火花，不過都無乜大問題。

接駁過江龍步驟

(1) 先取出一紅一黑的過江龍，它是一條很粗的電線。

過江龍

(2) 跟住要分辨清楚救車電池上的正負極，這步驟千萬不要搞錯。有(+)符號的是正極，有(-)符號的是負極。

另外就是不要讓過江龍互相纏繞，或互相碰到一起，也不要把過江龍放到車頭機件裡面，這樣有可能發生短路。

分辨救車電池上的正負極，有(+)符號的是正極，有(-)符號的是負極

(3) 分辨好後，找到汽車電池有紅色保護蓋的，那個是汽車電池的正極。

(4) 把紅色保護蓋揭開露出電極，然後把紅色過江龍夾到電極上面。

(5) 隨後把紅色過江龍夾到救車電池的正極上面(+)。

(6) 把黑色過江龍夾到救車電池的負極上面(-)。

(7) 跟住把黑色過江龍夾到汽車電池的負極上面。

(8) 這時汽車的電池已經接通，汽車上的儀錶板應該會重新亮起，這時可嘗試撻車。

(9) 假如救車電池上有足夠的電力，這時引擎該已撻著。

(10) 靜待引擎運轉幾分鐘，若引擎能正常運轉，可以把過江龍拆除，但不要熄引擎。

(11) 先把汽車電池負極上面的黑色過江龍取下，把夾子放到安全地方，不要碰到正極。

(12) 把救車電池的負極上面的黑色過江龍取下。

(13) 把救車電池的正極上面的紅色過江龍取下。

(14) 最後把汽車電池正極上面的紅色過江龍取下，完成救車程序。

撻車著咗架車煲住佢幾分鐘，run 返順副偈之後，就把過江龍拆走，但引擎運作聲音開始不暢順，怪怪地，還是決定把電池換新，費事去到驗車先出事，到時仲麻煩。

檢查呔紋深度

順手用電筒檢查一下呔紋深度，發現呔外圍1mm 凸起級部份已磨損，證明呔紋深度已經少於政府規定的最少1mm，唯有四條呔都換埋。

呔紋深度已經少於1mm，不符合政府規定

去到呔舖，師傅話我好野，可以用到條呔咁盡，條呔都行咗差不多五年了。

我同師傅話講想揾一條舒適寧靜車呔，不需要高性能，師傳推介1100元一條 Yokohama 最新的 Earth-1 EP400 轎車輪胎，四條呔合共4400元。

據師傅稱新輪呔屬於頂級型號，其實係採用最新的「橘油技術」 (Orange Oil)，可以減低車呔滾動阻力及運作温度，達到慳油4.4%喎，加上特殊靜音呔紋設計等各樣。

初步試用，感覺不及同廠的 C-Drive 般寧靜及舒服，呔嘈明顯比較大，聽到有類似磨擦的荷荷聲，而路面似有頻密的震動傳來，也許條呔未run順，但整体不及剛裝上新 C-Drive 時般順滑滿意。

另外，轉返用日本入水電池，之前呢的韓國環保電都係油麻地。

師傅話呢隻日本電池金屬電極較厚，連的士都用佢，貪佢電流大同耐用，佢話自己用咗三年都無問題，貴就貴少少要成九百元一件。

師傅換電時需要用另一台電池去養住行車電腦和防盜鎖，才可以把舊電池拆出。換了新電池一切正常返，我覺得入電池水的電池比較可靠，只是要經常檢查水位，一旦水位低過一半，電池就會玩完，我上一舊電池都是因為疏忽照顧，乾水過半而死。

師傳話而家驗車巳經無之前 check 得咁緊，結果今日驗車靚仔晒順利過渡。


作者: holidaydriver

發佈日期: 2012-03-10
更新日期: 2024-01-06