驗車,無電撻車,換車牌,換 Yokohama Earth-1 EP400 車呔

前年呢個時候,我係沙田馬騮山度,同架車和一群馬騮仔係度晒太陽,因為擋風玻璃裂咗驗車肥咗,落旺角買咗一套玻璃修補膠水,整好晒之後拎去晒太陽紫外光固化,效果 OK 驗車又過到骨。

前年第一次膽粗粗自己拎架車去驗,好多野都唔識無自己check清楚架車就走去驗,結果衰咗DVD機唔合法,唔得要拆走,俾咗100元音响舖去拆,塊擋風玻璃有粒星星裂痕又唔得要整,車尾車牌孔位裂咗少少又話唔得,要成塊換,車尾車牌燈有一粒燒咗又唔得,咁就要翻驗。


其實打算第一次自己揸去驗車,應該自行做少少功課,就唔難一次pass。除非有 機件損壞、或車上有非法改裝,要返車房先搞到嘅就話無法子要俾人做。

最基本可以自己先check 吓以下部份:
(1) 車牌有無裂痕,尤其位於螺絲孔。部份車牌用膠貼,用手拉吓有無黐唔實。 (其實靠黐應該唔多得,始終有機會甩出黎)


(2) 擋風玻璃有無裂痕,小星星有時得,有時星星太大,裂痕太長太礙眼,師傅擔心佢會越裂越大又唔得,要拎去玻璃舖打膠水。

(2) 車外所有大燈、小燈、指揮燈、車牌燈有無燒咗唔著,測試指揮燈左右運作是否正常。

(3) 車呔紋深度夠唔夠1mm,呔紋唔夠深,落雨行車或踩水有跣呔危險。

(4) 車窗水撥水,電池水,偈油、波箱油、軚油、迫力油水平是否充足,唔夠要入返滿。(5) 留意停車位地上有無漏油、漏水漬象,如果車底有滲漏,一定要先拎去維修,否則一定不合格。

(6) 留意車燈光度,判斷電池有無充足電力,有無過期。 檢查車頭燈燈影高度有無超過法定高度。

(7) 檢查有無安裝不合規格的DVD 機頭,反光紙,茶紙,碳纖貼紙等物品

(8) 留意死氣喉排出的廢氣顏色,氣味有無異常,如有藍煙、白煙、黑煙,很大汽油味,一定要拎去維修。

(9) 如果係買返黎的二手車,要了解及檢查車上有無任何非法改裝,包括進氣、排氣、剎車鉗、避震、尾翼、頭尾冚、引擎編號、車頭 HID 燈或非原廠燈組的改裝等。

(10) 檢查所有車門、車窗、頭尾冚是否正常操作,有無開不到、鎖不緊的情況。

(11) 檢查車內所安全帶釦是否正常運作, 有無開不到、鎖不緊的情況。

舊年就無乜麻煩,因為架車俾咗豐田做戈個「政府驗車前免費預檢」服務,貪佢有額外維修零件及人工半價優惠,揾佢地幫手換埋 cam 帶驗埋車,一次過搞掂。


今年又到自己拎架車去驗,不過今年就遇到一些麻煩。
第一次用網上續領十年期駕駛執照,用繳費聆即時付款洗咗900元。
晨早八點幾起身打算去驗車,想打電話去豐田驗車中心預約,點知無人聽。
找回那份牌薄正本,落街花11元買咗一支AA膠諗住黐返前面車牌戈成寸長裂痕,點知唔得,結果要用60元去呔舖整過一塊新車牌。
當用電筒檢查水箱存量時,見車廂燈隨指揮燈閃動,unlock 防盜喇叭都唔多想叫,覺得架車可能無電,於是試吓撻匙,摩打真係粒聲唔出一片死寂。
於是先替水壼注返滿水,返家檢查紀錄,發現電池是2010年3月買的,用咗剛好兩年,雖然環保電池裡面有綠色顯示,但電池外殼有些微拱起,車只係無用17天就無晒電,感覺十分不妥。

走去屋企附近相熟呔舖借咗一舊電池同埋好巨型的過江龍,諗住捧返屋企撻車,但電池好鬼死重,拎到斷晒氣,連大凍天時都照樣出晒汗。等我仲係網上面叫 d 人去呔舖借電池,行太遠真係未必得囉,實在太重了。

舊電池拎到返去,依照網上教人的方法次序接駁過江龍,原來將過江龍直駁電池正極真係會有好大火花,不過都無乜大問題。



撻車著咗架車煲住佢幾分鐘,run 返順副偈之後甩返過江龍,但引擎運作聲音開始不暢順,怪怪地,還是決定換咗電池佢,費事去到驗車先黎出事仲煩。

順手用電筒檢查一下呔紋深度,發現呔外圍1mm 凸起級部份巳磨損,證明呔紋深度已經少於政府規定的最少1mm,唯有四條呔都換埋,師傳都話我好野可以用到咁盡,條呔都行咗差不多五年了。

我話要舒適寧靜,不用高性能的車呔,師傳推介1100元一條 Yokohama 最新的 Earth-1 EP400 轎車輪胎,合共4400元。


新輪呔據師傅稱係頂級型號,其實係採用最新的橘油技術 (Orange Oil),可以減低車呔滾動阻力及運作温度,達到慳油4.4%喎,加上特殊靜音呔紋設計等各樣。

Yokohama Earth-1 EP400 產品資料(官方網頁)

初步試用感覺不及同廠的 C-Drive 般寧靜及舒服,呔嘈明顯比較大,聽到有類似磨擦的荷荷聲,而路面似有頻密的震動傳來,也許條呔未run順,但整体不及剛裝上新 C-Drive 時般順滑滿意。

另外,轉返用日本入水電池,之前呢舊韓國環保電都係油麻地。
師傅話呢隻日本電池金屬電極較厚,連的士都用佢,貪佢電流大同耐用,佢話自己用咗三年都無問題,貴就貴少少要成九百元一件。

師傅換電時需要用另一台電池去養住行車電腦和防盜鎖,才可以把舊電池拆出。換了新電池一切正常返,我覺得入電池水的電池比較可靠,只是要經常檢查水位,一旦水位低過一半,雹池就會玩完,我上一舊電池都是因為疏忽照顧,乾水過半而死。

師傳話而家驗車巳經無之前 check 得咁緊,結果今日驗車靚仔晒順利過渡。



作者: holidaydriver

發佈日期: 2012-03-10
更新日期: 2017-06-12

留言

Unknown寫道…
請問去邊度整車?
Unknown寫道…
請問去邊度整車?
holidaydriver寫道…
Hello,如果架車有問題,可以返原廠整。

這個網誌中的熱門文章

ELLE 行李箱維修

轉換行車線心得