泰豐小廚潮州打冷試食(粉嶺)

 想食潮州打冷很久，適逢中秋佳節就諗住食得豪一點，去咗屋企附近開咗好幾年的「泰豐小廚」試下。我見呢間潮州打冷舖生意十分暢旺，晚上經過都見到他們把檯櫈鋪滿店旁的行人路，我見咁多人幫襯，一定係很好食既，所以一於試試。

粉嶺 - 泰豐小廚潮州打冷試食

豉椒炒蜆

由於疫情似無還有，我仍然很少在街外吃飯，所以今次都例牌買外賣，打包拿回家吃。買咗四個餸，白飯就用自己電飯煲煮。雖然食潮州打冷，仍想試下佢地既小菜，睇下咩水準，加上我已經好耐未食過魷魚，所以叫咗一味椒鹽鮮魷 $128，另外有韭菜豬紅 $58，滷水鵝片 $148和豉椒炒蜆 $82。

粉嶺泰豐小廚門外

落咗單，店員仲招呼我坐低等，可能市民都去咗酒樓做節，店內客人比平常少。我睇住店內師傅立即切鵝片和豆腐，他們的豆腐會拿去煎一下，所以煎香咗幾好食。只係等咗一陣，都唔夠五分鐘，店員就把食物入好袋拿給我。

------------------------Advertisement

------------------------

離家之前已煮落飯，返到家等一陣就可以食，返家途中已聞到膠袋傳出很香的椒鹽蒜蓉味，原來椒鹽鮮魷是炸出來的，飯盒上開了大窿透氣，所以一路行一路香氣撲鼻。

回到家裡立即打開看看，很大盒的椒鹽鮮魷，雖然有點貴但看來份量不少。韭菜豬紅一碗都很大，至少比幫襯開的另一家潮州打冷店份量多很多，那些豬紅鋪很滿滿的又大件，未食落口已感到很滿足。

滷水鵝片看來就比較平凡，鵝片都是暖手的，而且全部厚切，看來比幫襯開的另一家潮州打冷店份量更重手一些。豉椒炒蜆就真係好多年未食過，一盒鋪很滿滿的，而且充滿香噴噴的豉椒，真係睇見都流口水。

先試椒鹽鮮魷，真係非常好食，即刻就話128元係抵既，外面炸粉咸香和脆，裡面的鮮魷又厚肉新鮮又軟滑，材料無偷雞，係一味讚不絕口的小菜。

椒鹽鮮魷

滷水鵝片雖然細細盒，淋咗熱既滷水汁，份量夠加上厚切，肥瘦適中，啖啖肉好和味，墊底下既豆腐都唔求其，有煎過，食落比較香口，感覺有少許特色，再加上很多花生，感覺滿足。

滷水鵝片

韭菜豬紅就唔洗多講，非常大碗，豬紅又大舊，食落好味又煙韌，不會一夾就散，食極唔完十分抵食，唯獨韭菜唔知係咪因為要食晒豬紅先夾到，浸得太耐，已經太老變得軟排排唔爽口，味道差咗少少。

韭菜豬紅

豉椒炒蜆炒得很香很清新和惹味，最犀利係d蜆完全無沙，令我食得十分暢快，已經很久未食過無沙的炒蜆，印象難忘。

豉椒炒蜆

總結呢一餐洗咗416元，這是我第一次光顧這一家店舖，感覺係非常滿意，難怪佢有咁多人幫襯，一定會再去光顧。

作者： holidaydriver
發佈日期：2023-10-16
更新日期：

泰豐小廚潮州打冷

地址：粉嶺聯和墟聯安街25號富燕樓地下

Google 地圖：https://maps.app.goo.gl/cdjzSciS3mBdAFX99

電話：+852 3690 1713

營業時間：星期一至日 17:00 - 02:00

附近聯安街，聯昌街，和豐街的路邊可供停泊車輛。