2015年4月初，我去幫車仔檢查機件，順便洗車，因為八月要驗車續牌，預早準備一下，以免車仔有乜野要整。
今年度好少用車，只行咗一萬一千公里，我例行添加電池水，水箱水，並用電筒照下引擎倉，看看有無異常。

2015年度驗車

赫然發現引擎前側表面四圍都很濕，鋪滿了黄色油漬及沾滿了塵埃，毛茸茸的油汚一直伸延到引擎左邊的下方。

我在車底觀察，發現地上有反光的油漬，疑似是車上有油汚滴到地面所造成。

機油從車滴到地上

把車從停車場移開，可以看到地上的油漬，新油漬是反光

再用燈照射油漬對上的車架位置，發現車架左邊有很大面積範圍呈濕潤反光的狀態，看來今次引擎漏油不輕。

車架左邊有很大面積範圍呈濕潤反光

現在回想起來，對上兩次駕完車，在停車場落車時聞到車子好像有陣熱腥味似的，有一些像塑膠溶化般的異味從車頭傳出，這種味以前從來沒有。由於沒能察覺有異樣，所以沒有處理。

這樣明顯的漏油，沒可能通過今年的驗車，肯定要返廠維修後才能出去驗車。

---Advertisement

---

上網研究關於引擎漏油問題，看來有兩個可能性，一個是火咀膠圈老化漏油，一個是凸輪軸蓋密封膠邊漏油，只要拆開引擎上的膠蓋便可以睇清楚。

有外國人試過DIY更換V6引擎密封膠邊，估計需要五個小時及大量体力。工程比想像中大，因為要拆開很多零件。包括要拆走整個進氣系統，真空系統，油門控制機件，若干感應器插頭，火咀及電線組，清理引擎汚垢及更換若干陳舊老化的膠邊等，估計人工佔維修費的比例較多。

2015年5月我致電凌志維修中心，預定去免費預檢維修，據職員說目前政府驗車排期要去到七月中，驗車排期狀況仍是比較緊張。

2015年5月中，駕車往凌志維修中心，由A經理接待我。
今次凌志玩法跟過往不同，A經理先安排免費預檢，他說其他維修事情後話，他希望架車可以即刻揸走，唔洗留係度。主要是我架車比較舊款，不一定有零件可以即刻進行修理。

他說師傅會跟足正式驗車步驟去檢查，只會尋找導致驗車不合格的問題，不影响檢驗合格的先不管。
他說不會像過往，強制要求我參加「標準維修檢查服務」，那個檢查收四千幾元，我可以自行選擇要不要做。他說幫我預約驗車排期在7月，到時揸架車返黎，坐一陣驗完可以走人。

我跟他說引擎有漏油……他像我睇開的某個醫生一樣，擺出一副不屑樣，他想我明白佢先係專業，我講漏油唔算數，他重申要等師傅睇過再決定有無問題。

講到冷氣機漏水，他一口就叫我放棄唔好整，因為佢知道好難整，要拆好多野先檢查到，單是檢查費已經唔少錢，仲可能唔止塞水喉咁簡單，有其他野可能要換。
(我上網查找，發現佢指的「好難整」可能係後蒸發器，這東西要成個錶板及中控台拆出來才有得整，的確是很大工程)。

說到泵把條膠邊，佢話佢地呢度只負責机械維修，車身嘅野要拎返去「噴油部門」才能處理……心諗凌志幾時變得咁官僚，要客人自己分門别類，自行找對部門處理。

跟住說到軚盤嘈音，佢又話這些不會影响驗車的唔好整，因為揾原因都要收錢，仲未計整車費用。
看他的表情，佢跟上次個職員一樣未能估計到係咩問題，連原廠都唔知發生乜問題，坊間更加無可能有人識整，我諗都係費事勞煩佢。

於是放低架車，就搭巴士返屋企。

2015年5月尾某天食午飯期間，A經理來電說車已經修理好，今日可以攞。他說除了引擎睜口漏油外，維修期間再發現兩個驗車會不合格的問題，包括軚尺漏油，另有一個叫甚麼stabilizer要更換，全部屬於軚盤部份，另外還有軚泵漏油要換軚泵。
當我問這兩個東西維修要幾錢，立即晴天霹靂，索價兩萬幾元，而且要在日本訂貨。由於太昂貴，我唯有自行在坊間揾人修理軚尺和軚泵，我這架車屬於偏門水貨，最麻煩是街上沒有人識得整。

---Advertisement

---

通常車房「唔識整」都會接黎做，然後「整唔到」就求其拆一些東西出來換，就話俾我聽「佢整咗」，後來我睇返件壞零件根本「無換過」，就知幫襯唔識整嘅車房，通常會俾人呃錢都未整好。所以即使昂貴，我寧願返原廠整，起碼佢唔會唔識整。

後來說給另一家維修店師傅知，他說訂正廠全新軚尺及軚泵的確要咁貴，所以唔會有人換全新料，一定揾二手或翻新過唔漏油的料，換咗過得到驗車就算數。至於Stabilizer，塵冚戈d，價錢比較平而且有雜廠料可用，就唔洗用二手。

2015年5月尾，請假去凌志拎返部車，在大堂坐咗大約二十分鐘，由一個容貌似韓式美男的B經理接待，佢個白滑斯文靚仔樣，一d都唔似整車師傅。

凌志汽車維修中心，顧客等候室環境很好

我覺得今期凌志嘅客戶經理跟以前不同，看來較年青斯文，外表似推銷員，唔似做過車房，令人懷疑有沒有整車經驗。
可能客戶本身也未必熟悉汽車，根本無必要找有經驗的師傅去做接待員。

洗咗三千幾元整咗上下「哇佬冚」踭口，同埋換咗火咀膠圈，感覺副引擎越來越嘈和震，我諗係因為師傅裝嵌「火嘴」功夫未及得上我咁仔細。通常每個氣缸火嘴安裝力度不相同，引擎轉動變得不平穩，容易震動。這是我從更換直四引擎火嘴中獲得的經驗。

話幫我調手掣就更差了，本來手掣鎖得住架車，而家整完仲鬆過以前，架車好容易溜前。

拎咗架車，拿拿聲揸車過去揾平時換油那個師傅，抵達時師傅剛剛接咗架車係度檢查緊，那架豐田Echo被師傅發現佢皮帶有裂痕要更換。
我八掛走埋去睇，真係裂咗，個車主知道就好驚，怕中途會斷皮帶。我安慰佢，只要唔好扯高轉或突然加速之類，條皮帶就無咁易話斷就斷，但都要盡快拎去換，因為唔知斷咗會有乜後果。

我想師傅幫手睇吓架車係唔係有咁多野壞，同埋可否介紹識整呢款車嘅師傅俾我。佢知道後就行咗去隔離車房，揾裡面負責整車嘅師傅C哥哥過黎幫我睇架車同報價。

---Advertisement

---

我問C哥哥佢識唔識整呢款車，C哥哥就話識。事後證實C哥哥係識整車，但沒有整這款車的經驗，因為他事後告訴我：「唔知呢款車咁難整」。

不過，我覺得揾C哥哥整車，早上揸車去佢車房放低，下午收工前可以揸走，手工都算好快，比返原廠更快更方便。

C哥哥拎住原廠免費預檢後發出的驗車不合格清單，可能張紙全部係英文，佢似乎唔識睇。
佢話若果我要求佢幫手驗車，就要先收五百元，可以在整車時扣返。
原本佢諗住照住張單去執齊堆零件，但俾我講吓講吓架車咁多野壞，佢又唔放心要親自揭開車頭同走落車底睇一睇。

於是我揸架車過去佢車房，C哥哥先去檢查引擎，佢叫我上車撻著引擎入前後波。原來就咁將波棍推前推後，引擎會往前往後擺動，這時就可以看到承托引擎的「偈躉膠」有無裂開。
好快佢就睇到引擎左边有一個偈躉膠裂咗，仲show咗俾我睇，果然明顯裂咗。他說偈躉膠一共有四個，爛咗的偈躉膠比較鬆，可能因此引擎比較震。

圓形的橡膠是偈躉膠，裂痕在這塊膠的背面，用手揭開可看見到裂痕

在引擎另一邊的偈躉膠

跟住C哥哥要檢查軚尺同軚泵，叫我揸架車入車房，車房地下有一條凹槽，可以俾佢走落去檢查車底狀況。佢就走落車底，叫我將軚盤向左擰到盡，跟住又向右擰到盡，跟住又重複了兩三次。

原地扭軚是相當吃力的事，現在軚尺有損壞，堂軚也越來越要用力去扭動。起初我以為自己年紀大，体力差咗所以扭軚都吃力咗，原來係軚泵同軚尺老化，動力輔助比以前弱咗，所以我就要多花氣力扭軚。
之後，C哥哥把車頭唧高，用手捉住頭轆摇晃了幾下，眼見頭轆機件看來有很多虚位，車輪明顯可以左右晃動。C哥哥指軚尺機件已經磨損了，所以這麼鬆，咁樣係過不到驗車。

2015年05尾某天，收工後揸車落去車房俾3000元訂金給C哥哥，等佢去買軚泵軚尺等零件，維修報價6800 元。
佢同我講:
- 淨係買支二手軚尺(軚箱)，收費三千幾元
- 軚泵買二手
- 軚油用正廠
- 偈躉膠用雜廠
- 轉向麈冚兩個
- 蝦鬚Stabilizer兩支

---Advertisement

---

我跟C哥哥提到前座積水問題，他指可能是冷氣機水喉甩咗或者塞咗，一定整得到，好似好有經驗的樣子。他說原廠經理黐線，大熱天時叫客人唔好開冷氣，咁要架車黎做乜。

2015年6月頭，C哥哥來電說零件已經到齊，叫我朝早揸架車去車房進行維修，C哥哥話三個小時內就搞得掂，點知佢一搞搞咗八個鐘，我估佢中途應該出咗事。

我等了一個上午，正當食下午茶時，C哥哥說架車即將整好叫我立即過去攞。我立即坐的士飛過去，見到車仔正從外面試車回來，我看見會動的車仔風采依然。

另一位師傅D哥哥正在車上調測軚盤，見他插咗一些東西入軚盤裡面左搞右搞，將架車移前移後。修好軚後，佢同C哥哥一齊檢查軚泵及軚尺，確定沒有漏油，之後用水喉沖洗車底，清理油汚，我見到車底冒出水蒸氣。
完工後支付尾數3500元，合共洗咗7000元俾C哥哥整呢次車。

我見佢地花多半日時間去修理，於是好奇問C哥哥架車係唔係好難搞，佢話難搞，佢唔知架車原來係d高級型號，安裝方法有d唔同，裝嘅時候有d野睇漏咗，裝完後要跟返正，所以用多咗時間，佢話自己今次報錯咗價，蝕咗水。
我覺得佢可能計少咗工時，因為用多咗時間。

我在網上下載了一份我的汽車型號「維修手册」，對更換軚尺及軚泵的工序有少許了解。若師傅沒有這份資料，他要靠經驗和常識去摸索，嘗試正確地拆解和安裝零件。
在香港有這麼多不同品牌和結構的汽車，車房師傅未必擁有各種型號年份的原廠維修手册，更加未必有時間去學習和鑽研，所以接生意時，往往只能靠經驗和知識去處理，中途難免會遇到麻煩。

我其實很想親自去維修車子，奈何自己沒有車房，而且香港也沒有專門讓人DIY的地方，供市民自行修理汽車。

C哥哥始終忘記咗要幫我整冷氣漏水和攝手掣，他立即吩咐D哥哥去補飛，D哥哥說要到師傅那邊升起架車先有得整，他指車廂地毯有四粒螺絲固定，就咁係掹佢唔起，所以今日無得整。

另外攝手掣同樣要升起架車，把兩個後轆拆出來才整到。他說手掣共分八格，通常調在第七格，原廠有時會調到第五格，為咗避免客人忘記鬆手掣而拖壞個brake。

---Advertisement

---

軚泵軚尺整好後，軚盤回復輕鬆的感覺，但仍未回復新車時的輕鬆。我立即檢查機件是否安裝妥當，之後便走去屯門兜咗一個圈，檢查操控是否正常。

某日早上揸車去揾師傅換油，洗咗千七元，無比一號已加價至895元/4L+220元/1L。

發生了一個小插曲，就是落車後忘記把門匙拔出，車門自動上了鎖，車匙也lock到車裡拿不出來，我要坐的士回家拿後備車匙過來開門，車子就把車房佔據了。

師傅說這個車門自動上鎖問題很普遍，自從有咗汽車防盗之後就經常發生。他說有款歐洲車的防盗更加麻煩，它不單會自動鎖門，更會自動關窗，非常惡搞。

2015年7月中，預約下午五至六時做驗車，四時半抵達葵涌的政府驗車中心，今次是第一次在這裡驗車。這個驗車中心都幾大，今日不算太多人，車一放低職員就拿車去驗。半小時後驗完，結果Pass可以走人。
今年驗車總共花費了萬幾元，希望出年驗車不用再維修了。

如果你想知道最新的政府指定驗車中心資料，可按此到運輸署名單 (2022年01月03日)。


作者: holidaydriver
發佈日期: 2015-08-02
更新日期: 2022-02-12