取得駕駛執照的第一天，好開心約埋三個老友，一齊夾份去租架車，展開人生第一次自由自在的駕駛旅程。

新牌仔的第一天

我人生擁有的第一輛汽車

租車行就在其中一個老友的屋企附近，取車後老友提議由他駕駛，先走一轉返家，視察一下路途。
平時坐車返屋企就坐得多，自己渣車返去就完全是兩回事。

心諗：「做司機要睇路、睇車、睇行人，又要做人肉GPS 諗下條路點樣行，在那裡轉左，那裡轉右咁麻煩。」

回老友家路途雖然很近，卻花了許多時間才抵達，如果是坐的士，早就到了，幸好路上沒出問題。

由於大家輪住試駕，我一上車就無理咁多，漫無目的見路就行，沒有研究車身距離，沒有分享駕駛技術，只是小心奕奕地慢慢前進。

---Advertisement

---

駛到觀塘繞道時，我正在快線行駛。
我望一望後鏡，看到後面有車輛白色車忽然在閃高燈，就問坐在左面的老友芬哥：「咦，佢做乜閃你燈呀？」

芬哥掉轉頭望左一下，回答：「啊，你唔洗理佢，繼續行得o架啦。千祈唔好加速，保持而家速度 OK o架啦。」

芬哥是車上眾人中最有駕駛經驗，而我係新牌仔，當然應該聽從他的建議，一於唔好亂黎，保持安全車速…

不久，後面那輛白色車自右線轉到左線，迅速爬頭超越我們，然後立即由左線轉到右線，剛好繞到我們的前面…

我們前面的路面本來是一架車也沒有，當白色車繞到我前面時，他便大力剎車....

我見狀當然也立即剎車，於是車上成班人向前仆了一下…

「嘩，搞乜鬼呀，無端端剎車，撞你個鬼，玩乜野牙…」我在叫。

正當不知發生甚麼事之際，那白色車再來一次剎車，我見狀當然又再立即剎車，我們又仆多一下…

「嘩，佢擺明玩野喎！」我一邊表達不滿，一邊腳板不由自主地準備迎接挑戰，引擎聲開始提升…

芬哥喝道：「你咪理佢呀，唔好加速!」

於是我看著那輛白色車飛快地駛走了。

雖然芬哥說得對，我不應理那白色車，但我個心好似俾人強暴過一樣，久久未能平服。心諗：「乜路上d人咁鬼野蠻，擺明蝦新牌仔，好衰格…」

我只知給人欺負，但未知道自己犯了甚麼錯。

新牌的第一天便給人污辱了。

新牌仔的第二天，遇著爆呔

我們很快忘記過去，四條友仔又再上路，繼續無厘頭四圍轆的旅程。怎知轆下轆下，忽然遇著爆呔！

落車一看，不知何來的一條粗木方，竟然打橫的刺到呔壁之上，弄穿了一個非常大的孔，眾人看見嘖嘖稱奇。

睇電視見人地換車呔就多，自己換車呔都係第一次，於是毫不猶豫立即「笠架生」學人試下換車呔。

我地四個人都是機械工程界的未來棟樑，雖然大學老師無教過我地點樣換車呔，但段估無可能難得到我地呱。

結果發現，電視機裡常出現男仕幫女仕換車呔的橋段，原來係呃人既。條車呔不知幾難換，令我知道如果街邊有女仕爆車呔，千祈咪亂充英雄，因為隨時變狗熊。

小白到車尾取出「千斤頂」放到車底，然後開始積起架車…

---Advertisement

---

「咦，奇勒，搞極架車都唔升起」…

「咦，個車殼仲開始拱出來」…

「睇o下先，咦個千斤頂頂住個車殼，似乎唔多妥喎，個車殼軟軟地，頂唔頂得起架車傢？」

於是我彎低身到路邊睇下...

「嘩，個車底咁矮又黑麻麻，點睇到車底係點樣呀。」

小白問:「點先知架車邊忽頂得呀？」

我試下用隻手伸落車底摸下，看看車底有邊忽硬凈 d ，可以用來頂…

摸左一輪，都唔確定車底可以頂的位置，於是求其找一條似乎係車架的地方頂上去。

註：如果車輛的懸掛改裝過，車身曾經降低的話，這個伸手到車底，或放入千斤頂的動作，便會好難做得到。

擾嚷了一會，萬眾期待的車身終於升起了，好開心。

跟住小白拿著扳手，打算把螺絲拆出來，點知搞極條車呔都團團轉，無辦法可以拆螺絲…

芬哥建議把車放回地面，讓車呔不能轉動…

芬哥好計謀，於是我又將千斤頂搞返低，把車放回地上，車呔碰到地面後，果然不再轉動了。

跟住更大的問題來了，眾人中最大力的老友丁爺，他拿著扳手點搞都無辦法把一口螺絲鬆出來。

「嘩，咩螺絲黎架，咁鬼死實既！」四個人輪流嘗試都唔成功。

「個轆咁低，根本唔就手，身体發唔到力，呢個扳手點設計架？」

四條友企晒係度無計可施，仲搞到身水身汗，芬哥拿出煙仔食，大家抖下諗計仔。

租咗架車遇著爆呔，大家企晒係度無得玩，小白等到唔開心，發脾氣一腳伸落支扳手度。

點知呢一伸，居然整鬆左粒螺絲！

「咦，乜呢支唔係叫扳手，係叫扳腳咩？！」我說。

雖然破解了使用「扳腳」之謎，但要用力伸開五粒螺絲，四個人要輪流在扳手上面又踩又UN ，搞左成半個鐘頭，踩到扳手都彎埋，才把車呔拆出來。

原來用人手裝拆車呔，係好鬼辛苦既工作，我地成四個人出手都搞到斷氣，你話電視橋段入面男主角只得一人，幫女主角換車呔，要不要搞足一日呢?

把後備車呔裝好，如是者又再踩又再 UN，把螺絲收緊。真係踩到斷氣咁滯，千斤頂前後也升降了四次，搞到我手都軟…

成個過程搞左兩粒鐘，學完換呔好充實，還車返屋企休息。

新牌仔的第三天

芬哥借來一部 2000cc 車，想給我們示範一下它的扭力有多強勁。
他選擇了深水埗上大埔道的一段向上的斜路小試牛刀。

不知是芬哥未出盡全力踩油，還是車上坐滿四個大漢，車子完全發揮不出應有的推背力，簡單講就係無料到，失望。

新牌仔的第四天

很久沒有駕駛了，日前跟隨一位同事幫公司送貨，回程時同事在東區走廊上示範其超凡駕駛技術，逢車過車，實在非常精釆，令我十分羡慕他的身手。

將近抵達銅鑼灣時，他示範由五波直轉三波，只聞車尾呔吱一聲響，車子很快便由高速減慢下來… 真係好鬼型。

於是，我約了一個教車師傅補鐘，企圖模仿我那位同事的敏捷加速手法，(當然我的速度還差很遠)。

看來踩油加速不太難掌握，學車以來我從未試過加速得咁快…

不過，快駛到迴旋處時，我拖波不夠快，減速亦不夠多，成架車直衝入迴旋處，師傅立即出腳剎車…跟住就俾師傅鬧到X街。

之後唯有乖乖地咁渣，到落車的時候，師傅仲串我一句：「都唔知你識渣車，定係唔識既…」

新牌仔的第五天

小白買咗一部十年車齡的二手戰車，它是一輛單門揭背小房車 Ford Laser 。

說它一輛戰車真的沒錯，它有細小的賽車呔盤，沒有風油呔，桶形賽車座椅，笨重的極力子，快速波棍，四輪硬避震…

可惜這麼強勁的設備，對新牌仔來說是英雄無用武之地，因它的主人小白和我根本不知道這些賽車裝備是甚麼東東，有甚麼了不起。
只知它是一輛很舊，離合器很重，容易死火，呔盤緊到不得了的二手老爺車。

無論如何，我們還是開著小白的新寵兒去遊車河，遊下遊下去到龍蝦灣。

四個人去到N年前的龍蝦灣，只想看看那裡有無方便偷情的落腳點。日光日白當然無野睇，於是開車回程。

龍蝦灣有一段非常斜的斜路，正當小白駕車準備駛上斜之際，忽然有一輛本田思域從上邊直衝下來。

---Advertisement

---

由於這條路是狹窄的單線雙程行車，我們車頭剛好封左半條行車線，即使我們立刻停下，對方仍收掣不及直剷過來....
bomb的一聲，車內眾人向前一仆... 

對方的車撞到我們車的左角後，未能即時停下，仍繼續衝前大的五十米外才停得下來。
就這樣，發生了人生第一起交通意外。

驚魂甫定，各人都沒有損傷，於是一起落車走到車頭看看損毁情況，因為當時撞擊力都相當大...

「咦，奇o勒，點解車頭一d事都無既?」大家都很驚奇，怎麼可能這麼強的撞擊，車頭一點事也沒有。。

大伙兒左睇右睇，睇唔到車頭有唔妥既地方，完全無撞過既痕跡，無刮花，無變形。小白見到架車無事，立即鬆一口氣。

於是我們一齊抬起頭，望望距車尾老遠那架本田思域...
「咦...乜佢爛成咁!」

那架本田思域正橫擺路中，左邊車頭毁爛不堪，指揮燈爆裂，燈罩只靠一條電線吊在車外。
車頭泵把整個飛脫，遺留在附近的地面....

小白見對方架車爛得咁誇張，若問對方拿賠償，好像不近人情。反正自己的車沒有受損，決定不追究，但對方會不會問他拿賠償，大家都覺得這些事很難說。

所以小白叫大家立即上車走人，不要留係度多生事端。
大家也不敢異議，立即上車離開咗。

在車上，眾人開始擔憂會不會被控告不顧而去。芬哥說：「我地當時見對方在斜坡衝下來，小白巳即時踩停咗架車，我地係被人撞，所以不算不顧而去。」

我地都一致認同，未撞之前，小白已把車完全停定了。

丁爺就話：「如果唔係親眼見到，真係唔相信小白架 Ford 係咁堅硬，摸落去完全感覺唔到。」

我就話：「好彩呢次係人地撞你乍，如果你部車撞到其他車，人地爛晒你都未爛，咁就真係大鑊鳥。」

小白很認同：「新牌渣車難免會撞，撞爛自己架車都好過撞爛人地架車，起碼唔洗賠錢賠兩邊。而家架思域雖然撞得好爛，但佢自己撞自己爛，唔洗賠錢俾其他人，未必唔好。新牌買車都係唔好買太硬既車，有乜碰撞都係爛自己，渣到上咗手先換架硬野未遲。」

我說：「小白，雖說你架車好硬，但剛才撞擊力唔細，我懷疑你架車點樣都會有損傷，可能剛才太急未睇到。不如你停埋一便，等我落車再睇清楚。」

小白將車停下，我到車頭細心看，終發現左邊泵把向後移了幾毫米。
估計泵把在撞擊時，被思域往後推，吸收撞擊力量之餘，更把思域反彈開去，造成思域的泵把和指揮燈損毁。

隨後我用手將泵把向前拉回原位，小白的 Ford 就回復本來面貌了。撞車的事，就這樣告一段落。


作者: holidaydriver

發佈日期: 2003-03-09
更新日期: 2017-06-06