【美食】布袋澳漁村食海鮮，享受海風中的美味

 每逢家中有人生日，都會約埋家人一起外出食飯慶祝。平時去得酒樓多，食普通野又悶，食海鮮又貴，想試吓新口味和新環境，又唔想同人迫。咁啱細佬和同事去過布袋澳吃海鮮，就提議入去布袋澳「翻尋味」。(c1x1)

布袋澳漁村食海鮮，享受海風中的美味

大家約好在布袋澳村入面的海鮮酒家等，分頭揸車入去。布袋澳村附近無大型停車場，所以食客車輛只能泊在路邊，細佬話去到附近就有人在路口接應。

我之前未去過布袋澳，未知裡面咩環境，先用Google Map 看看。因為我怕熱、怕蚊又怕黑，所以一早準備兩把USB風扇、蚊怕水和電筒先入去。

揸車沿清水灣道入去，到達大㘭門一處細小迴旋處，在路旁有個白色底綠色字寫住「清水灣鄉村俱樂部」，沿住箭咀方向進入大㘭門路。

通常拎到新牌既朋友，或帶住女朋友的車手，十居其九都到過這條路遊車河。這條路很長，盡頭是清水灣鄉村俱樂部，沿路左手邊是清水灣的美景。

清水灣的美景

這裡人跡罕至，中途會經過一處有涼亭的地方，那裡是假日比較多人聚集的地方，該處是清水灣的「遙控滑翔機飛行場地」，每逢假日有東風的日子，路旁就擠滿了玩滑翔機的愛好者。

---Advertisement

---

到達布袋澳村路口時，左轉沿路落山，會遇到在路邊負責接應的工作人員，他們指示我泊車在路旁，因為車子要剷上路肩停泊，以免撞欄，他們會小心幫手睇位。泊好車拎住紙仔，山下就有專車過來載我們落山到村口。若不是太多來客，或不是來得太晚，就有機會泊得較接近山腳，步行入村也不會太遠。

海鮮酒家位於村入面靠近布袋澳碼頭的位置，其實是建於海旁上。

發記海鮮酒家

今次光顧的酒家是「發記海鮮酒家」，它差不多直接建於布袋澳二號碼頭上。我們就坐在燈塔旁開餐，這裡風很大，坐外面吹下海風，別有一番景緻。

布袋澳一號碼頭

布袋澳一號碼頭海灣全景

酒家亦設有室內冷氣場，不一定要坐外面吹下海風，但室內反而無乜特別景觀，而且嘈音比較大。室內場大圍枱可以坐較多人，通常一家大小人多時就會坐室内，亦可避免小孩不小心墮海。

白灼鮮魷魚片

細佬知我鍾意食白灼鮮魷魚片，爽口彈牙鮮甜美味，點豉油和日式芥末醬，食到唔停口。

陳皮蒸鮑魚

阿媽知我鍾意食鮑魚所以點咗陳皮蒸鮑魚，鮑魚都很鮮很入味，唯外殼黐得很緊，要花九牛二虎之力才吃到一隻，仲要小心俾佢跳過檯面逃回大海。

椒鹽瀨尿蝦

椒鹽瀨尿蝦是家人至愛，他們食到津津有味，唯獨我從來不喜歡食這味異形虫。

芝士焗龍蝦伊麵底

主菜芝士焗龍蝦伊麵底，龍蝦大隻多肉，幾個人食夠晒分，芝士好入味又香濃，伊麵底更是少有的好食，做功絕對比許多大酒樓好。 

入夜後，偶然會有遊艇泊岸，讓乘客經碼頭登岸，可能來吃飯。

布袋澳一號碼頭夜晚燈火通明，景象別緻。

埋單找數時記得拿紙仔俾店員加上蓋印，好讓之後回到村口乘搭接駁車時使用，因為專車司機會檢查紙仔和蓋印。專車會車我們回到山上取回車輛，食完飽飽滿足離開。

發記海鮮酒家地址：新界西貢布袋澳村7A號地下

Google Map 

   

布袋澳村裡亦有其他酒家可供選擇，這些酒家都由同一班人負責在村口提供接送。

若乘搭公共交通，可於地鐵坑口站，南豐廣場門外乘搭16號綠色專線小巴前往布袋澳總站，下車位置剛好就在村口，非常方便。

希望你喜歡這篇文章。

最後一提，小弟跟上述酒家沒有任何關係，純粹個人分享。

作者：  holidaydriver

發佈日期：2021-11-08

更新日期：2023-09-21