今年又再自己拎架車去驗，架車今年已經十歲了，佢狀態很好，我十分滿意。
之前我才讚過原廠個 HID 車頭燈耐用，成十年都唔洗更換燈膽，點知當我臨出發前往驗車中心前，其中一個車頭燈竟然壞咗。

2013年度驗車

車頭燈係度閃吓閃吓，好似光管壞咗咁款，咁樣去驗車實肥佬....

今年為咗驗車，我已經花咗兩個鐘係架車度做 DIY 檢查，包括:

(1) 檢查全車所有車燈有沒有壞咗，有無影響行車安全。

基本包括車頭低燈，所有指揮燈，壞車警告掣燈，車尾燈，剎車燈，倒後車燈，內籠燈，錶板燈；
另外檢查比較少留意到的車頭高燈，霧燈及車尾牌燈。

(2) 檢查全車所有電動裝置是否正常運作

包括左右倒後鏡，電摺鏡，所有電動車窗，電動門，電動尾箱蓋，電動蓬或電動車頂的開開合及其按鈕的運作，電動門鎖上鎖及解鎖，全車水撥，司機位電動座椅，車尾窗發熱線，入後波時的倒車警號等。

---Advertisement

---

DVD機我又要將佢拆出暫時拿走，因為法例唔容許安裝DVD車机，可恨係原裝車機壞咗至今，仍未在市場上找到一台沒有DVD的 2DIN 車機。由於中控台穿了一個洞，朋友又問我發生乜野事。

(3) 檢查全車所有手動裝置

包括軚盤，波棍及其上的按鈕運作，所有腳踏及手掣是否操作正常，倒後鏡，車門鎖的裡外開關，司機門鎖及車尾箱上的車匙孔。

所有安全帶測試扯出及看看是否自動收縮，大力拉扯安全帶看看能否自動鎖緊，安全帶釦能否鎖緊及順利鬆開，如果鬆開不暢順或 cake住，只要噴一點WD40入去便可以解決。

測試開啓油缸掣及油缸小門是否正常開啓及鎖緊，油缸旋轉蓋有冇未擰緊或遺失咗。

測試開啓車頭冚掣，車頭冚是否可以鎖緊，撐住車頭冚的支撐是否正常運作。

測試開啓尾門掣、尾門及鎖是否正常運作。

(4) 檢查到車頭入面

首先睇吓台機器有冇乜野唔妥，用電筒週圍照吓，睇吓有冇乜野裂咗，生銹、溶咗或者唔見咗，睇吓有冇滲漏，膠喉有無老化甩開咗之類。

跟住拔出支偈油尺，波箱油尺出黎，睇吓油量是否充足。

然後輪到檢查電池，一早買咗支電池水放係車尾，將電池入返滿水佢就搞掂。

跟住輪到檢查水箱水，檢查水位正常。

檢查水撥水，這個明明前一晚已入滿咗，點知臨出發又乾晒塘，不知d水去了那裡，又唔見有漏水，再入返滿算數。我發現驗車師傅真係會測試水撥及試噴水，所以必需入滿水撥水。

跟住輪到檢查軚盤油及剎車油，這兩個東西從來未添加過，今次發現軚盤油剛好去到Low的位置，擇界... 為免麻煩，驗車一個星期前走到坊間尋找在軚盤油蓋上註明的DEXRON II，卻找不到。

上網查，資料顯示DEXRON II 已經 phase out，可以用 DEXRON III 去代替，但一樣揾唔到。

在一間汽車用品店找到一支包裝很鷄的疑似代用品，但店員話無謂為咗十幾元，走去拎個咁貴既軚盤黎冒險，佢話整壞咗軚盤會好貴唔值得，叫我去揾車房....

心諗有冇咁誇呀，我堂軚係電軚，入油俾電軚已經夠離奇，我唔信佢入戈少少油就會瓜。Anyway，我都信咗店員講，再去揾。

後來，揾到一支35元的加德士 DEXRON III，唔理咁多，我餵車仔飲咗佢，因為佢要趕去驗。

(5) 好勒，撻著架車，睇吓有冇乜野唔妥

引擎聲正常，風扇運行正常，冷氣泵運行正常，水温正常。走去車尾，睇吓死氣喉有沒有噴出黑、白、藍煙，結果一點煙也看不到，OK。聞吓排出的廢氣味，無乜特別，OK。

(6) 圍繞車身行一圈，睇吓有冇野甩咗，鬆咗，或者裂咗

例如泵把，膠邊，車牌唔可以有裂痕，擋風玻璃不可以有明顯或會擴大的裂痕。

我就發現頭唇上的膠邊有點鬆凸咗出黎，要用手推返去原位，今年度擋風玻璃沒有被雜物彈裂，毋須滴膠。踎低望吓車底地面，睇吓有無新鮮漏油漬及漏水漬，冇就OK。

(7) 望吓四條車呔是否正常

車鈴有冇損壞變形，螺絲是否齊全穩固，泵氣喉的喉咀蓋是否存在。

看看呔紋深度，是否多過法例規定的最少1mm。大致 OK後，打開尾箱看看後備呔氣壓是否正常...。

其實仲應該睇吓迫力皮夠唔夠厚，但唔升起架車很難觀測得到，這個要倚靠車房換偈油時進行評估。

---Advertisement

---

臨出發去驗車前自行再返檢，發現車頭燈壞咗，拿拿聲揸車出去附近舖頭諗住配返個燈膽。點知個原廠燈膽係貴到無人有。事後我打電話去豐田問價，一個飛利浦D2R原廠燈膽竟然賣二千幾元一粒，所以好多舖頭話咁貴根本唔會入貨，只係賣代用品。

我在街邊舖頭配咗一粒240元的雜廠Xenon燈膽，個老板仲話HID燈係咁貴，無普通燈膽咁平喎。我記得以前架Civic用嘅係黄色鎢絲燈膽，後尾改用藍藍地的鎢絲燈膽賣百幾元一對。師傅花咗廿幾分鐘先換到個膽，跟住我就即刻去驗車。

今次好快就驗完車 Pass 咗，但係當我揸車返家停車場時，我發現個新車頭燈出咗好大問題，理論上驗車係唔會Pass的，今次我係好彩。

原來個新燈膽射出個燈影炒高咗好多，應該超過法例要求離地面一米之內，實際使用會照射到前面架車司機位。我架車本身具有自動調節燈影功能，理論上係懂得自動調低返個燈影，可能因為個sensor裝係右手邊，而右邊未換燈膽，所以佢就唔識自動調節。

我打去問汽車零件舖，佢話我換戈個兩百幾元燈膽係大陸無牌貨，質素同垃圾一樣，可以拎去揼咗佢云云。尤其係個大陸膽射出黎個燈影好細好集中，唔同原廠燈膽咁射得比較勻循、寬闊和靚，個大陸膽射到一撻撻咁左右兩邊都有漏光，看起來非常之cheap和肉酸，估計遇著大風雨時，視野肯定無原廠戈個膽咁清晰。

所以我決定上網去訂返隻原廠膽返黎替換，我諗驗車師傅俾我pass，也許考慮到個原廠膽不容易配得到。



作者: holidaydriver
發佈日期：2013-06-22

更新日期：2023-09-30