路面濕滑,幾乎俾飛車撞倒


~~~ 舊事重提 ~~~

此帖網上瀏覽人數 超過四千。

2009年 9月15日颱風「巨爵」襲港,導致一輛疑似戰神幾乎撞到 holidaydriver。

15 日零晨 00時35分,香港天文台發出八號暴風信號,黃色暴雨警告及新界北水浸報告。巨爵於零晨2時最接近香港,其中心風力達 140 km/hr。天文台在上午10時左右改發三號強風信號,下午 1時35分改發一號戒備信號,全体香港人要起身返工。


8 號風球落波,個個趕出門口返工,我渣住架車係觀塘繞道上面向沙田方向行駛中,忽然從倒後鏡 見到一架深藍色 改裝過的戰車,好似導彈咁 超快而來...

我見佢踩得咁快,原本想入快線都唔入住,讓條快線俾佢插過.... 點知佢殺到我旁邊收慢果陣,架車忽然左典右典...

當時呢架 炮彈飛車 轉緊左急彎兼前面有車阻住,佢入彎急又要收掣,加上天雨路滑,四個轆忽然唔咬地...

初時我見佢架車少少失控啫,若果係打機既話 呢 d 情況通常都救到車既,所以我仲懶腦定係佢側邊無 action ...

點知越黎越唔妥呀,佢架車越典越犀利,我見車內那位人兄起勢扭軚都救唔到架車,佢快要撞嘞...
我此刻才醒覺大鑊,感到体內有一股血氣上湧,可能係腎上腺素....

個大哥睇黎搞唔掂喇,佢忽然想衝過慢線撞我車身.... 我立即踩 brake 喇,點知佢又救返架車去右邊...

睇黎佢係 唔想撞到我,搏命咁救,於是我睇準佢架車開始墮後時機,踩油加速,趁佢仲未炒之前逃離他身旁... 
之後,他先撞向右邊牆... 然後反彈到慢線,當時我的車尾僅僅越過他車頭,倒後鏡見到佢再撞埋左邊牆...

唉,一個突如其來的意外,幾乎領嘢,好彩車手大哥救住佢架車,我先走得甩咋。
但係呢位大哥架車撞成點,就望唔到嘞。

(完)

好多網友睇咗,留言給我如下 :

驚險...、嚇餐死...、精釆...、潮文...、夠張力...、有死神來了 feel、緊張又刺激...、

好似頭文字 D 第40集...、大命夾好彩、

顧住望人地,自己有無睇路...、

拎定啤洒花生睇故仔、睇完先知係作文...、

故事未夠緊湊...、唔知真定假...、有啲膠味...、

好似足球小將,故事情節太慢...、

入緊同一個灣,加速踩油去都冇事...有無可能、

大哥仲快過你, 你仲可以加速走人? 仲要落緊雨,對架車真係有信心...、

好似賽馬直擊咁犀利...、渣車最怕比人累...、

太精彩 la,都要回一回.....真假都好...。


也許我寫得太長兼有點頭文字 feel 呱 (網友唔講我都唔知呀, haha!),搞到大家以為我老作,其實絕對唔係。

觀塘繞道來回線,我跑過不少次,有次落雨掟彎太快,出現推頭現象,架車唔肯轉彎... 
心諗:「這裏一旦失手,勢必刮住牆走」,我絕對唔想。只是沒想過在雨天,車軩咬地極限咁快就到。自己炒車預咗,但無諗過人地炒車自己無地方閃,可以咁無辜咁危險。

由我看見對方開始失控,到佢撞車,大概三秒內嘅事情。但對我來說,事情發生的一剎那,尤其當腎上線素上腦後,一切速度忽然變得好慢...好像連佢架車典咗幾多吓都數得到咁。

所謂「大哥、人兄、車手」,只是尊稱該位不畏死的司機,與甚麼知名人仕並無關係.... 如果有,小弟真係有眼不識泰山嘞。

我知道佢典完最 last 果吓就會撞右邊牆,十居其九跟住會反彈,我再唔走 就死緊喇,所以咪抓緊佢仍在右擺中那半秒加速逃離囉...,佢撞右邊分隔牆時,因為牆身斜斜地,車會爬上牆後略為減慢,再反彈掉下來約需多半秒,那一秒鐘幸好俾我走得甩。

查實當時前面係咩環境... 我無時間再去望,那幾秒我全程都望住隔離架車 睇吓點執生救自己 (其實救自己架寶貝車)。出事前,我車速大概巳跟前車同步,當時車速比車手大哥慢一半都有,當他剎車時,車速和位置剛好跟我平排,出事後我加速並超越 前面慢線那輛車 (因為那時大哥的車巳反彈到慢線上)。

我有再加速的空間而那位車手卻失控,聽落有點不合邏輯。估計他唔知隻彎咁急 或 忽略咗地面濕滑因素,入到彎先落 Brake 所以俾水跣。如果唔係有水同埋佢 late brake,佢架車應該唔會跣腳。

我覺得係落雨天先黎飛車係好危險,尤其係呢類改裝跑車,計埋呢部我巳親眼見過兩部戰車 因水而係我左近出事。

對上一部係 DC2 在黄雨中貪快超車失控撞欄反彈,幾乎累我攔腰炒埋佢度,果次巳夠晒嚇鬼,今次又俾呢位車手大哥咁搞法,真係驚到而家仲未驚完。

由於事出突然,我未能確定那車手大哥渣甚麼車,只知車身有包圍兼 low 低咗,個樣疑似舊款戰神。

水對車軩到底有多大影響,稍後再辟專題交流吓。


作者: holidaydriver
日期: 2010/05/20

返回頁首

留言

這個網誌中的熱門文章

ELLE 行李箱維修

轉換行車線心得