有人問：

「斜路開車 比空油，再吊極力士，放手掣去個下好易feel到摩擦點到左未.....其實得唔得?」
答： 呢招好得，尤其係在非常斜的停車場，或者後面有車跟貼 一定唔可以溜後的情況下，必須要出呢一招。

斜路開車心得

關鍵係你幾時才能確定 車子有足夠力量 反地心吸力向前行，才鬆手掣。

你吊極力子 吊到幾時先知佢到咗，先知佢唔會溜後，又會唔死火?

答案係:「吊極力子吊到你感到車子有一下向前 chok 的動作。」

你可以試下吊極力子，吊到你 感到車子向前 chok 了一下，這時保持車子位置不動，不要鬆開手掣，然後慢慢將極力子踩返低，直至感到車子向前動力消失，車子向後 chok 回剛才未起步的位置，你就會估到極力子磨合的真正位置。

車子 chok 果吓其實好少幅度，因為拉咗手掣車子不能向前移動，但引擎扭力能驅動車輪，改變車身角度，從而產生 chok 的感覺。

即使係自動波車，在極斜路開車，在鬆手掣之前都要先踩油，踩到架車向前 chok ，才好鬆手掣，咁就包保唔會溜後。

---Advertisement

---

有部份停車場喜歡將入票出閘機放在勁向上斜的斜坡上，由於試過幾次在這種停車場失暈或失手發生高速溜後事件，現在每逢在勁斜的斜坡上出閘，必定十分謹慎，因為一旦有乜差錯，就會隊爛後面的車頭，賠車頭比賠車尾貴得多。

到目前為止，我試過最斜的出閘機位於下圖鰂魚涌太古坊德宏大厦停車場，裏面的出閘機位於一條超級上斜坡中間。要將車停定在出閘機旁很困難，因為不論點樣用力拉手掣，都拉不停架車，一鬆腳掣車便很快溜後...真係好奪命嘅設計。

於是，我拉緊手掣仍不放腳掣，伸手插票開閘... 此際後面有一輛保時捷駛來跟著，幸好她離開有兩米以外...

因為我從未試過在斜坡起步時右腳居然唔係去踩油門，而去了踩Brake腳掣阻止溜後，加上後面有輛保時捷，更加唔可以失手...忽然唔知應該點做先好??

緊張之下好易做傻事，我做錯了起動步驟，我首次轉用左腳踩住剎車腳掣，右腳移往油門，先鬆手掣(超錯)，車還未動，我以為極速一鬆腳掣然後踩油門，車應該不會溜後太多...點知一鬆腳掣，車子極速溜後，於是更加大力踩油... 因為車輛重心去了車尾，前輪驅動時車呔竟然咬不緊地面而空轉，好恐佈!! ...車子好像懸停了一會，才慢慢向前脫離險境。

這裏真的太斜，隨時連 Hill Start 都唔 work。

後來回想起來，不論任何情況都不應先鬆手掣，因為手掣在斜坡上即使鎖不死車子，但它仍能減慢車子溜後，不會突然一下子極速往後退。

我當時的正確起動步驟應該如下:

(1) 駛到停車場閘機旁，右腳踩剎車腳掣剎停車子。

(2) 盡力拉緊手掣，右腳繼續踩緊剎車腳掣，保証車子不會溜後。

(3) 插卡或嘟卡打開停車場閘桿。

(4) 用左腳踩住剎車腳掣，右腳慢慢抽離，但腳掣必須繼續踩住，並保持車子在剎停狀態 (這個要練習，因為我們絕少用左腳去踩剎車腳踏，感覺有點「論盡」，加上右腳當時亦踩著腳踏，左腳要攝入去踩腳踏，並不是一下子能做到的事)。

(5) 右腳轉去踩油門，俾油，直至感到車子向前 chok，保持踩著油門，不要收油。

(6) 慢慢提起左腳，減少剎車力度，感受一下車子是想向前還是向後移動。

(7) 如果你感到車子沒有溜後、想往前移動、甚至它已經開始向前走，就可以鬆手掣，踩油駛離停車場。

(8) 如果你提起左腳，減少剎車力度後，感到車子開始往後移動，說明你右腳踩油可能在chok之後減少了。

此時左腳要重新踩停車子，右腳再用力一點踩油門，直至感到車子向前chok。保持右腳力度不要鬆開，俾大一些油亦無影響，左腳剎車再次慢慢鬆開。

最緊要檢查停車場閘桿已升起，否則車子向前走會把閘桿撞毀。如果你感到車子沒有溜後，甚至它已經開始向前走，就可以鬆手掣，駛離停車場。


作者: holidaydriver
發佈日期: 2009/11/22
更新日期: 2022-02-27