車呔吉釘漏氣要補呔





在香港四處建築地盤,一條呔吉住幾支釘真係閒閒地,漏氣唔太勁咪行住先。我試過條車呔吉住幾支釘行咗幾個月都無乜事,佢無咁易爆呔。
通常吉釘第一日漏氣最快,第二朝條呔就扁咗好多。
去油站充返氣照行好似無乜事,其實條呔膠會慢慢變形包實支釘,填充漏氣的空罅,減低漏氣速度。




若然你係吉大頭釘,釘頭通常會外露呔紋外面,用眼見到或用手摸到。
大頭釘漏氣速度比較慢,打返氣都可以照行好耐無乜事,不過條呔點都會不斷漏氣,要隔幾日就打氣。

但吉螺絲漏氣會好快,而且螺絲通常俾人削去螺絲頭,吉入呔後不易看到或摸到,甚為麻煩。DIY 補呔最難係揾支釘吉在那裏,若不把車輪升起不易找到。而且釘通常由頭轆捲起,再吉進尾轆,DIY 尾呔唔就手,困難得多。
我通常在換偈油時揾師傅順手修理埋,都係50-60元一支釘。或者駛去呔舖,整咗佢好平,幾十元拔出一支釘再補返,補返之後完全無事,無再漏氣。

若不懂補呔及沒有泵呔設備在手,千祈不要拔釘,一拔漏氣仲更加快。

不過唔係次次都拔支釘搞掂,如果吉住太多支釘,呔舖師傅就會建議我成條呔換。
師傅會視乎車呔年期,磨損程度及吉釘數量,去判斷你有無需要成條呔換。

例如上述我條車呔吉咗好幾支釘,每拔出修補一支釘計幾十元,拔晒咁多支都要幾百元,加上條呔磨損程度又差不多,係時候要更換,咁不如成條呔換,好過煩去拔釘。

亦有一些外國文章,叫人一吉釘就要成條呔換,因為怕長途旅程中途爆呔。
據說車呔係以行駛速度分級數,例如我條車呔速度級數係V,代表行駛速度極限為240公里。在外國穿州過省踩到240公里很普遍,不過以一條曾經吉過釘的車呔來講,在240公里長時間高速飛馳,在高氣壓及高摩擦熱的程況下,吉過釘的傷口就有機會在高速運轉中擴張,破損引致爆呔。由於爆呔時車速高所以份外危險,外國人會比較重視這個問題。

不過在香港我們無乜機會開到240公里,只有不到一半車呔極限的100公里可以踩,所以因車呔速度達至極限,引致爆呔的可能性非常低,補呔變得安全又經濟的修理方法。

建議日常行駛盡量避免駛經地盤附近,尤其是有天橋、上蓋工程的地盤。
若是必經之路,車速應盡量減慢,減低頭轆因快速而捲起釘頭螺絲之類尖物。
因外國有研究發現,釘很少機會直立於路面刺進頭轆,通常由頭轆捲起在路面滾動,再順勢吉進尾轆。

避開地面可疑雜物如木頭、三角鐵之類亦減少爆呔機會。

每次開車前,宜觀察車呔有無足夠呔紋深度及氣壓,檢查呔前後有無人故意放置釘或螺絲整蠱你。


作者: holidaydriver
日期: 2009/07/24

返回頁首

留言

這個網誌中的熱門文章

ELLE 行李箱維修

轉換行車線心得